Clár Pobail um Ghníomhú ar son na hAeráide (CCAP)

Is incháilithe iad eagraíochtaí pobail a chomhlíonann na ceanglais atá liostaithe thíos chun iarratas a dhéanamh ar chistiú faoi Shnáithe 1 agus faoi Shnáithe 1a den Chlár Pobail um Ghníomhú ar son na hAeráide (CCAP) chun tionscadail a sheachadadh a théann i ngleic le hathrú aeráide ag leibhéal áitiúil agus chun tacú le seachadadh pobal ísealcharbóin atá athléimneach ó thaobh na haeráide.

Eagraíochtaí comhphobail:

• ní mór é iad a bheith ina n-eagraíochtaí neamhbhrabúis.
• ní mór iad a bheith lonnaithe i limistéar oibríochta an údaráis áitiúil (Comhairle Contae Chorcaí) a bhfuil iarratas á dhéanamh aige ar chistiú chuige.
• ní mór foirm iarratais chomhlánaithe a chur isteach roimh an dáta agus an t-am atá leagtha síos.
• ní mór iad a bheith cláraithe le PPN nó a bheith bainteach le comharchumainn eile amhail Wheel, Bailte Slachtmhara agus/nó grúpa pobail a bhfuil Airteagail Chomhlachais nó Bunreachta acu, a mbíonn Cruinniú Cinn Bhliana acu, agus a bhfuil miontuairiscí faofa ar fáil dóibh.

Ina theannta sin:

• Ní mór an tionscadal a bhfuil iarratas á dhéanamh air a bheith i gcomhréir le haidhm/cuspóir an Chláir Pobail um Ghníomhú ar son na hAeráide (CCAP), agus leis na critéir atá incháilithe do chistiú.
• Ní fhéadfar ach iarratas amháin in aghaidh na heagraíochta a chur isteach lena bhreithniú — d’fhéadfaí roinnt de na téamaí a chur san áireamh sna tionscadail atá beartaithe agus iad a chuachadh le chéile mar chuid d’aon iarratas amháin.

Agus tionscadail á bhforbairt, ba cheart do ghrúpaí pobail machnamh a dhéanamh freisin ar an gcaoi a gcuireann a dtionscadail bheartaithe le dul chun cinn i ndáil le Spriocanna Forbartha Inbhuanaithe ábhartha.

Níl na nithe seo a leanas i dteideal iarratas a dhéanamh:

• Daoine aonair príobháideacha.
• Gnóthais tráchtála (lena n-áirítear trádálaithe aonair).
• Eagraíochtaí náisiúnta pobail agus comhshaoil.
• Scoileanna, institiúidí tríú leibhéal etc.
• Institiúidí airgeadais.

Ina theannta sin, i gcás tionscadal a dhéanann iarratas ar chistiú faoi Shnáithe 1a:

• Ní mór do cheanneagraíocht atá i ndlínse Chomhairle Contae Chorcaí, le heagraíocht chomhpháirtíochta amháin ar a laghad i dTuaisceart Éireann, iarratais a dhéanamh.
• Cuirfear iarratais faoi bhráid Chomhairle Contae Chorcaí (i.e., sa dlínse ina bhfuil an phríomheagraíocht lonnaithe).
• Ní mór iarratais a bheith comhdhéanta de thionscadal trasteorann i gcomhpháirtíocht le heagraíocht i dTuaisceart Éireann.
• I bhfianaise na scóipe do thionscadail uile-oileáin, tá eagraíochtaí náisiúnta pobail agus comhshaoil incháilithe chun iarratas a dhéanamh faoi Shnáithe 1a.
• Ní mór eagraíochtaí comhpháirtíochta a bheith ina n-eagraíochtaí neamhbhrabúis, ina n-údaráis áitiúla, nó ina n-eagraíochtaí pobail nó comhshaoil, atá cláraithe i dTuaisceart Éireann.

Molann Comhairle Contae Chorcaí go láidir d’iarratasóirí ionchasacha teagmháil a dhéanamh leis an Oifigeach Pobail um Ghníomhú ar son na hAeráide roimh aon aighneacht chun incháilitheacht a dheimhniú ag climate@corkcoco.ie.

Tionscadail atá Incháilithe do chistiú

Sna cineálacha tionscadal/tionscnamh, laistigh de phobail, atá incháilithe le haghaidh cistiú faoin gClár Pobail um Ghníomhú ar son na hAeráide (CCAP),& ba cheart go bhféachfaí le gníomhaíocht náisiúnta ar son na haeráide a chur i gcrích ar an leibhéal áitiúil trí na nithe seo a leanas a dhéanamh:

1. Laghdú a dhéanamh ar astaíochtaí gás ceaptha teasa nó tacú leis an laghdú sin.
2. Táirgeadh nó úsáid fuinnimh in-athnuaite a mhéadú.
3. Éifeachtúlacht fuinnimh a fheabhsú.
4. Athléimneacht in aghaidh an athraithe aeráide a mhéadú.
5. Tionscadail dhúlrabhunaithe a shainaithint lena bhfeabhsaítear an bhithéagsúlacht agus lena bhféachtar le hastaíochtaí gás ceaptha teasa a laghdú, nó baint na n-astaíochtaí sin a mhéadú, nó lena dtacaítear le hathléimneacht aeráide sa Stát.
6. Cúnamh a thabhairt do réigiúin sa Stát (lena n-áirítear pobail sna réigiúin sin) agus laistigh d’earnálacha den gheilleagar a bhfuil tionchar ag an aistriú chuig geilleagar ísealcharbóin orthu.
7. Réitigh a d’fhéadfadh a bheith nuálach a úsáid chun aghaidh a thabhairt ar na hiarrataí thuas.

Go sonrach, ní mór tionscadail a fhorbairt freisin chun gníomhú ar son na haeráide a dhéanamh thar an méid is mó de na cúig théama cláir a leanas agus is féidir. Dá bhrí sin, d’fhéadfadh roinnt de na cineálacha tionscadail atá molta mar a leagtar amach i dtéamaí 1 go 5 thíos a bheith i dtionscadal. Cé go soláthraíonn na téamaí sin moltaí maidir leis na cineálacha tionscadal a d’fhéadfaí a chistiú, níl iarratasóirí teoranta do na cineálacha tionscadail sin a roghnú agus spreagtar iad chun tionscadail nuálacha a fhiosrú a chomhlíonann cuspóir an Chláir Pobail um Ghníomhú ar son na hAeráide (CCAP).&

Ba cheart do thionscadail aghaidh a thabhairt ar na cúig théama seo a leanas:

• Fuinneamh Pobail
• Taisteal
• Bia agus dramhaíl
• Siopadóireacht agus athchúrsáil
• Gníomhú áitiúil ar son na haeráide agus an chomhshaoil&

Ina theannta sin, cé gur cheart do thionscadail a bhfuil cistiú á lorg acu faoi Shnáithe 1a aghaidh a thabhairt ar na cúig théama chéanna le tionscadail Snáithe 1, tá réimsí ar leith ann freisin a d’fhéadfadh a bheith oiriúnach go háirithe do chur chuige an Oileáin Chomhroinnte. Mar aitheantas ar chomhtháthú na mbeartas um ghníomhú ar son na haeráide agus ar son na bithéagsúlachta, d’fhéadfaí na nithe seo a leanas a áireamh orthu:&

• Líonraí don Dúlra a luacháil
• Feirmeoireacht inbhuanaithe
• An tAistriú Cóir
• Athchóiriú ar thailte portaigh
• Fuinneamh in-athnuaite
• Réamhaisnéis tuilte
• Creimeadh cósta

Is ceanglais éigeantacha iad seo a leanas nach mór gach tionscadal beartaithe a bheith i gcomhréir le bheith incháilithe chun cistiú a fháil do Snáithe 1 agus do Snáithe 1a den Chlár Pobail um Ghníomhú ar son na hAeráide (CCAP):

• Ní mór do thionscadail a bheith incháilithe le haghaidh cistiú ón gCiste um Ghníomhú ar son na hAeráide (Snáithe 1) nó ó Chiste an Oileáin Chomhroinnte (Snáithe 1a), mar atá leagtha amach sna critéir incháilitheachta.
• Ní mór do thionscadail gach riachtanas reachtúil a chomhlíonadh maidir le pleanáil, rialacháin tógála, Sláinte agus Sábháilteacht, agus Cóid Dóiteáin, más cuí.
• Ceanglaítear ar iarratasóirí a chinntiú go bhfuil gach cead agus toiliú pleanála agus rialála is gá i bhfeidhm ag a dtionscadal sula gcuirtear a n-iarratas isteach. Tá sé de dhualgas ar an iarratasóir a chinntiú go bhfuil na tosca sin breithnithe go leordhóthanach ina dtionscadal. Ní bhíonn tionscadail a dteastaíonn cead pleanála uathu incháilithe chun maoiniú a fháil ach amháin má tá an cead seo i bhfeidhm tráth a chuirtear isteach iad. Ní mheasfar tionscadail a bheith incháilithe chun maoiniú a fháil mura gcomhlíontar an critéar seo.
• Ceanglaítear ar chomhpháirtithe ionchasacha féindeimhniúchán a dhéanamh nach bhfuil an cistiú ar fáil dóibh chun tabhairt faoin obair gan tacaíocht, nó mar mhalairt air sin go gcuirfidh an tacaíocht ar a gcumas níos mó oibre a dhéanamh nach mbeadh ar a gcumas murach sin.
• Ní mór comhpháirtithe ionchasacha a bheith in ann a gcumas a léiriú chun na hoibreacha atá beartaithe a dhéanamh.

Soláthar

Ní mór d’iarratasóirí tabhairt faoina dtionscadal i gcomhréir le treoirlínte soláthair phoiblí maidir le gach earra, seirbhís agus oibreacha a sholáthar. Agus an fhoirm iarratais á líonadh isteach acu, iarrtar ar eagraíochtaí trí luachan ar a laghad a chur san áireamh le haghaidh aon cheannacháin earraí, seirbhísí nó oibreacha don tionscadal. Féadfar aon luachan bhreise do sholáthróirí a chur i gceangal ar leithligh. Ba cheart luachana a bheith infheidhme maidir leis an uair atá an tionscadal le tosú agus aon mhéadú ar chostais atá beartaithe a chur san áireamh. Ba cheart d’iarratasóirí breithniú a dhéanamh ar sholáthar glas, i gcás inar féidir.

I gcás nach féidir trí luachan a lua le haghaidh táirge/seirbhís ar leith nó go bhfuil ualach rómhór ag baint leo i gcás comhpháirteanna tionscadail iolracha, féadfar an ceanglas maidir le trí luachan in aghaidh na míre a tharscaoileadh agus féadfar an t-iarratas a mheas ar na luachana atá ar fáil. Ba cheart fianaise dhoiciméadach a chur ar fáil ina léirítear na hiarrachtaí a rinneadh chun trí luachan a fháil nuair is féidir. Ba cheart don iarratasóir dul i gcomhairle lena Oifigeach Pobail um Ghníomhú ar son na hAeráide sula gcuirfidh sé/sí a iarratas isteach. Ní mór do Chomhairle Contae Chorcaí a bheith sásta go bhfuil luach ar airgead san iarratas agus luach agus go ndeachaigh an t-iarratasóir i dteagmháil le soláthróirí chun a thogra a fhorbairt.

Cistiú agus Costais Incháilithe

Déanfaidh Comhairle Contae Chorcaí na costais incháilithe a mheas ar bhonn cás ar chás. Beidh feidhm ag na coinníollacha ginearálta seo a leanas, áfach:

• Ní mór na costais a chuirtear isteach a bheith chun críche an tionscadal a chur chun feidhme agus chun na críche sin amháin agus ní bhainfidh siad le haon chuspóir eile.
• Ní mór nach bhfuarthas cistiú poiblí dúblach, nó nach bhfaighfear é, ó fhoinsí eile chun na críche céanna.
• Ní mór costais a bheith infhíoraithe, e.g. trí fhianaise ar sholáthar poiblí, sonrasc agus admháil ar íocaíocht.
• Cuirfidh an Roinn Comhshaoil, Aeráide agus Cumarsáide comhairle ar Chomhairle Contae Chorcaí má mheastar go bhfuil roinnt costas neamh-incháilithe ón tús. Cuirfear an méid sin san áireamh i méid an deontais a mholtar agus sa mhéid a dhámhtar agus a chuirtear san áireamh sa chomhaontú deontais don togra.
• Ní féidir le comhpháirtithe an costas a bhaineann lena dtrealamh nó lena n-áitreabh féin a úsáid a chur san áireamh.
• Ní mór an cistiú a bheith i gcomhréir leis na ceanglais maidir le Státchabhair.
• Cuirfidh an Clár Pobail um Ghníomhú ar son na hAeráide (CCAP) suas le 100 % den chistiú ar fáil do thionscadail rathúla, de réir théarmaí agus choinníollacha an chláir. Is féidir cistiú eile a ghiaráil do thionscadail (e.g. cistiú LEADER, Bailte Slachtmhara, Feabhsú Bailte agus Sráidbhailte, etc.) cé nach riachtanas é sin don chlár seo. Tá sé de fhreagracht ar riarthóirí/comhlachta atá freagrach as aon scéim nó clár cistiúcháin eile a chinntiú nach dtagann úsáid CCAP chun tionscadal a chomhchistiú salach ar rialacha na scéime/an chláir eile sin.

Seo a leanas samplaí de chostais/tionscadail nach bhfuil incháilithe faoin gClár Pobail um Ghníomhú ar son na hAeráide (CCAP):

• Tionscadail a théann chun tairbhe do dhuine aonair amháin
• Teagasc/foireann
• Costais taistil agus iompair ach amháin in imthosca eisceachtúla
• Trealamh, ach amháin má tá baint dhíreach aige leis an tionscadal
• Tionscadail a ghineann ioncam
• Forchostais, costais reatha leanúnacha
• Árachas
• Cóiríocht agus cothú
• Costais iomarcaíochta
• Pionóis/Ús/Ús Bainc/Muirir
• Aisíocaíochtaí iasachta
• Costais chúlghabhálacha, i.e. caiteachas a tharla roimh dháta formheasa an tionscadail
• Tá costais a bhfuil deiseanna cistiúcháin níos iomchuí ann dóibh cheana féin neamh-incháilithe, i gcás inar léir go dtagann cistiú ón gClár Pobail um Ghníomhú ar son na hAeráide in ionad cistiú poiblí eile atá ar fáil faoi láthair
• Costais bharúlacha e.g., an seomra a fháil ar cíos laistigh d’áitreabh an iarratasóra féin
• Táillí Dlí

Níl an liosta seo uileghabhálach, agus déanfaidh Comhairle Contae Chorcaí gach costas a mheas ar bhonn cás ar chás. Eiseofar gach íocaíocht deontais ón gClár um Ghníomhú Pobail ar son na hAeráide i riaráistí agus le haghaidh caiteachas deimhnithe incháilithe amháin.

Ceanglais maidir le Státchabhair

Beidh ar iarratasóirí féinmheasúnú a dhéanamh an ionann aon chistiú féideartha a gheofar dá dtionscadal ón gClár Pobail um Ghníomhú ar son na hAeráide agus státchabhair. Sna cásanna a bhaineann le státchabhair, ceanglófar ar na grúpaí a dhearbhú go bhfuarthas Státchabhair De Minimus roimhe seo agus aon chistiú a thairgfear trí Rialachán De Minimus (Rialachán (AE) Uimh. 1407/2013 ón gCoimisiún), gur ar bhonn cúnaimh a thairgfear é, ar choinníoll nach sáródh sé uasteorainn De Minimus ábhartha. Má tá tionscadal neamh-incháilithe chun cistiú a fháil trí Rialachán De Minimus d’fhéadfadh an grúpa a bheith incháilithe chun cistiú a fháil trí Scéim GBER CAF. Sa chás seo, déanfaidh Comhairle Contae Chorcaí tuilleadh teagmhála le hoifigigh ón Roinn Comhshaoil, Aeráide agus Cumarsáide.

Tá Comhairle Contae Chorcaí ag lorg iarratais anois ó eagraíochtaí incháilithe do Shnáithe 1 den Chlár um Ghníomhú Pobail ar son na hAeráide (CCAP) faoi ghairm fhorlíontach ar iarratais (Gairm 1, Cuid B).

Osclófar an tréimhse iarratais Dé Céadaoin, an 11 Nollaig 2024 agus dúnfar í ar 16:00, Dé Céadaoin, an 22 Eanáir 2025.

Tá an próiseas iarratais oscailte d'iarratasóirí incháilithe nach ndearna iarratas faoin gcéad ghairm (Gairm 1, Nollaig 2023), agus molann Comhairle Contae Chorcaí go láidir d'iarratasóirí ionchasacha teagmháil a dhéanamh leis an Oifigeach um Ghníomhú Pobail ar son na hAeráide ag climate@corkcoco.ie sula ndéanfar aon aighneacht chun incháilitheacht a dheimhniú. Glacfar le hiarratas amháin ar a mhéad in aghaidh na heagraíochta.

Ní mór tionscadail ar éirigh leo a sheachadadh laistigh de 10 mí ó dháta bronnta an mhaoinithe agus ní bheidh caiteachas incháilithe ach amháin tar éis conarthaí idir an t-iarratasóir ar éirigh leis agus Comhairle Contae Chorcaí a bheith curtha i gcrích (réamh-mheasta do R2 2025).

Ceanglaítear ar iarratasóirí a chinntiú go bhfuil gach cead agus toiliú pleanála agus rialála is gá i bhfeidhm ag a dtionscadal sula gcuirtear a n-iarratas isteach. Tá sé de dhualgas ar an iarratasóir a chinntiú go bhfuil na tosca sin breithnithe go leordhóthanach ina dtionscadal. Ní bhíonn tionscadail a dteastaíonn cead pleanála uathu incháilithe chun maoiniú a fháil ach amháin má tá an cead seo i bhfeidhm tráth a chuirtear isteach iad. Ní mheasfar tionscadail a bheith incháilithe chun maoiniú a fháil mura gcomhlíontar an critéar seo.

Is clár iomaíoch é an Clár Pobail um Ghníomhú ar son na hAeráide (CCAP), agus is é an tAire Comhshaoil, Aeráide agus Cumarsáide a dhéanfaidh an cinneadh deiridh maidir le faomhadh an tionscadail. Níl aon phróiseas achomhairc ag an gClár Pobail um Ghníomhú ar son na hAeráide (CCAP) agus is cinneadh críochnaitheach iad cinntí uile an Aire.

Díríonn Gairm 1 Cuid B go láidir ar thionscadail níos nuálaí agus moltar go láidir freisin iarratais a chur isteach ó thionscadail i Limistéar Dícharbónaithe Chontae Chorcaí (Maigh Chromtha).

Déanfar iarratais a mheas bunaithe ar na sonraí a chuirfear ar fáil san fhoirm iarratais a chuirfear isteach, agus tá critéir mheastóireachta do thionscadail incháilithe leagtha amach sa doiciméad dar teideal CCAP, Gairm 1 Cuid B – Snáithe 1 Critéir Mheastóireachta.