Breis is €400,000 do Thionscadail Oidhreachta Seandálaíochta i gContae Chorcaí

Tá ocht dtionscadal oidhreachta seandálaíochta tábhachtacha i gContae Chorcaí le breis is €420,000 a fháil ón Roinn Tithíochta, Rialtais Áitiúil agus Oidhreachta faoi Chiste na Séadchomharthaí Pobail 2024. Tá an ciste á riar go háitiúil ag Comhairle Contae Chorcaí, agus bunaíodh é in 2020 chun séadchomharthaí seandálaíochta agus láithreáin stairiúla áitiúla a chaomhnú, a chothabháil, a chosaint agus a chur chun cinn.

Tá roinnt sruthanna maoinithe ag an gciste atá dírithe ar oibreacha caomhantais ar shéadchomharthaí seandálaíochta a chumasú a mheastar a bheith suntasach agus a dteastaíonn tacaíocht phráinneach uathu chun a gcur i láthair a fheabhsú agus chun athléimneacht a thógáil i séadchomharthaí, ag cur ar a gcumas éifeachtaí an athraithe aeráide a sheasamh i slí níos fearr.

Áirítear ar thionscadail rathúla Chontae Chorcaí cúig shuíomh seandálaíochta ar le Comhairle Contae Chorcaí iad:

• Gheobhaidh oibreacha caomhantais ag Balla Múrtha Bhaile Dhroichead na Bandan €30,000
• Gheobhaidh oibreacha caomhantais ag Séipéal Coláisteach Naomh Muire in Eochaill €100,000
• Gheobhaidh oibreacha caomhantais ag Eaglais na hÉireann Ráth an Bharraigh €30,000
• Gheobhaidh oibreacha caomhantais ag Séipéal agus Reilig Chill Ghalláin i gCeantar Bardasach Mhainistir Fhear Maí €82,396.65
• Feabhsófar rochtain agus comharthaíocht i Reilig Theampall Bríde, gar do Bhun an Tábhairne, le €29,720.

Gheobhaidh trí shuíomh tábhachtacha seandálaíochta eile sa chontae maoiniú freisin;

• Gheobhaidh Oibreacha Caomhnaithe ag Coimpléasc Muilte Radharc an Chaisleáin, gar do Chloich na Coillte €100,000
• Gheobhaidh Plean Bainistíochta Caomhnaithe do Shuíomh Eaglasta Naomh Abán, Baile Bhuirne, €19,680
• Bainfidh Ardeaglais Naomh Colmán i gCluain leas as Plean Bainistíochta Caomhantais ar luach €30,000.

Agus é ag fáiltiú roimh na leithdháiltí, dúirt Méara Chontae Chorcaí, an Comhairleoir Frank O’Flynn, an méid seo

Ó cuireadh tús leis den chéad uair in 2020, tá tacaíocht tugtha ag Ciste na Séadchomharthaí Pobail do roinnt tionscadal den scoth i gContae Chorcaí. Ní hamháin go dtacaíonn an scéim le caomhnú oidhreacht lómhar seandálaíochta an chontae, spreagann sé grúpaí áitiúla a bheith páirteach ann freisin. Tacóidh bronnadh de bhreis is €400,000 faoi scéim na bliana seo le roinnt tionscadal den scoth.

Dúirt Príomhfheidhmeannach Chomhairle Contae Chorcaí, Valerie O’Sullivan,

Tugann leithdháileadh Chiste na Séadchomharthaí Pobail i mbliana d’ocht dtionscadal éagsúla le tuiscint ar dhoimhneacht na hoidhreachta seandálaíochta sa chontae, ag tacú le tionscadail ó shéipéil go coimpléasc muileann tionsclaíoch i measc eile. Ó 2020, tá infheistíocht de bhreis is €1.33 milliún feicthe ag an gcontae tríd an scéim agus leanfaidh sé ag tacú le caomhnú timpeall 19,000 séadchomhartha seandálaíochta i gContae Chorcaí.