Straitéis Uirbeach Chomhtháite Shráid an Cheantaigh (Cloich na Coillte)
Tá Straitéis Uirbeach Chomhtháite Shráid an Cheantaigh (Cloich na Coillte) á comhchistiú ag Rialtas na hÉireann agus ag an Aontas Eorpach trí Chlár CFRE do Réigiún an Deiscirt, an Oirthir agus Lár na Tíre, 2021-27.
Tá stair shaibhir ag Sráid an Cheantaigh, atá suite i gcroílár Chloich na Coillte. Tá seacht n-ionad réadmhaoine ar an tsráid faoi úinéireacht Chomhairle Contae Chorcaí agus dá bhrí sin tá deis uathúil laistigh de chreat Lár Bailte ar dTús lárionad uirbeach Chloich na Coillte a fheabhsú mar áit bhríomhar do dhaoine a bheith ina gcónaí, ag imirt, ag obair nó ar cuairt.
Chun luach na sráide seo agus an bhonneagair phoiblí máguaird don tsochaí a fhíorú go rathúil, ní mór go mbeidh ceangal réidh aici leis an éiceachóras gnólachtaí agus taitneamhachtaí ar fad laistigh de Chloich na Coillte. Laistigh de theorainneacha na hoidhreachta tógtha atá ar an tsráid cheana féin, táimid ag iarraidh obair a dhéanamh leis an bpobal chun Sráid an Cheantaigh a chlaochlú ina spás álainn do mhuintir Chloich na Coillte. Ar aon dul le creat Lár Bailte ar dTús agus prionsabail Bauhaus Nua na hEorpa, bheadh an athfhorbairt faoi stiúir an phobail, ildisciplíneach agus dírithe ar bhonneagar comhroinnte a sholáthar atá inbhuanaithe, álainn agus inrochtana.
Tá Sráid an Cheantaigh comhthreomhar le Sráid an Phiarsaigh (príomhshráid Chloich na Coillte), agus tá Cearnóg Emmet, a athfhorbraíodh, ag ceann amháin den tsráid agus Sráid Rossa ag an gceann eile. Is príomhionad cultúrtha í an tsráid seo i gCloich na Coillte, mar is léir ó na 10 bhfoirgneamh ar Shráid an Cheantaigh atá liostaithe ag an tSeirbhís Oidhreachta Tógtha Náisiúnta. D'fhéadfaí an tsráid a athnuachan ar go leor bealaí trí spás tearcúsáidte a cheangal leis na gnólachtaí agus leis an oidhreacht thógtha máguaird.
D'éirigh linn cistiú THRIVE €200,000 a fháil agus fostaíodh sainchomhairleoirí chun Straitéis Uirbeach Chomhtháite a fhorbairt do Shráid an Cheantaigh. Spreagfaidh Straitéis Uirbeach Chomhtháite Shráid an Cheantaigh feabhas suntasach i gcroílár bhaile Chloich na Coillte agus éascófar táirge turasóireachta, fás geilleagrach, rannpháirtíocht phobail agus caomhnú oidhreacht níos fearr mar gheall uirthi.
Spreagfaidh an straitéis seo comhtháthú sóisialta trí spásanna pobail a athbheochan, forbairtí measctha a chur chun cinn agus conláistí poiblí inrochtana a chruthú. Is é an fhís atá ann do Shráid an Cheantaigh ná ceantar álainn atá tarraingteach do choisithe ina bhfuil conláistí pobail agus gnólachtaí agus ina gcothaítear caidreamh i measc mhuintir na háite agus cuairteoirí araon.
Ó thaobh an gheilleagair de, is féidir leis an Straitéis Uirbeach Chomhtháite gnólachtaí áitiúla a spreagadh trí infheistíocht agus turasóireacht a mhealladh chuig lár an bhaile. I measc na n-iarrachtaí a d'fhéadfaí a dhéanamh chun an ceantar a athfhorbairt, tá foirgnimh phoiblí a bhfuil cuspóir nua acu a sholáthar, an sráid-dreach a fheabhsú agus rochtain níos fearr a sholáthar ar an abhainn, rudaí a chuirfeadh le mealltacht na sráide mar mhol tráchtála.
Mar thoradh ar an Straitéis Uirbeach Chomhtháite, sainaithneofar úsáid deiridh do na foirgnimh ar Shráid an Cheantaigh atá inmharthana agus a bhfuil tacaíocht faighte ón bpobal ina leith, agus cuirfidh an pobal na tionscadail in ord soiléir tosaíochta.